Home Blog Page 3

भरतपुरमा श्रीमतीको खुकरी प्रहार गरी हत्या पछि श्रीमान द्वारा हाम्फालेर आत्महत्या

चितवन , साउन ९ – चितवनको भरतपुरमा श्रीमानले श्रीमतीको खुकरी प्रहार गरी हत्या गरेका छन्। भरतपुर महानगरपालिका वडा नं. १० रमाईलो चोकमा ३५ वर्षीया रुस्मा घिमिरे (आचार्य) को उनका श्रीमान ४३ वर्षीय कृष्णप्रसाद आचार्यले खुकुरी प्रहरी गरी हत्या गरेको जिल्ला प्रहरी कार्यालय चितवनका प्रवक्ता नरहरि अधिकारीले जानकारी दिए।कृष्णप्रसादले आफ्नै घरको तीन तला माथि रहेको बैठक कोठामा श्रीमतीलाई खुकुरी प्रहार गरेका थिए। खुकुरी प्रहारबाट गम्भीर घाइते भई उपचारको लागी रुष्मालाई पुरानो मेडिकल कलेज लगिएकोमा आइतबार राती नै १०ः४० बजेको समयमा चिकित्सकले मृत घोषणा गरेको जिल्ला प्रहरी कार्यालय चितवनका प्रवक्ता नरहरि अधिकारीले जानकारी दिए।श्रीमतीलाई आक्रमण गरेलगतै घरको छतमा पुगी श्रीमान कृष्णप्रसाद आचार्यले हाम फालेका थिए। घाइते भएका आचार्यको पनि उपचारको क्रममा मृत्यु भएको प्रहरीले जनाएको छ। दुवैजनाको शव पोष्टमार्टमको लागि भरतपुर अस्पतालमा राखिएको छ।

माडीमा पुष्पलाल र मदन भण्डारीको शालिक अनावरण

चितवन ,साउन ७ – नेपाल कम्युनिष्ट पार्टी एमालेका पोलिटब्युरो सदस्य एवम् चितवन जिल्ला ईन्चार्ज देवीप्रसाद ज्ञावलीले पुष्पलाल र मदन भण्डारीका विचारले नै नेपालको कम्युनिष्ट आन्दोलन अगाडि बढेको जनाउँदै उहाँहरुका विचारहरुलाई अनुकरण गर्दै अगाडि बढ्नुपर्ने आवश्यकता रहेको बताउनुभयो ।
४४ औं पुष्पलाल स्मृति दिवसको अवसरमा पुष्प – मदन स्मृति व्यवस्थापन समिति माडी ६ द्वारा आज शनिबार आयोजित शालिक अनावरण कार्यक्रममा पुष्प -मदनको शालिक अनावरण गर्दै पोलिटब्युरो सदस्य ज्ञावलीले पुष्पलाल र मदन भण्डारीका विचारद्वारा नै नेकपा एमाले अगाडि बढिरहेकोले नै देशको लोकप्रिय पार्टी बनेको धारणा राख्नुभयो।
पुष्पलाल र मदन भण्डारीले दलाल, नोकरशाही र पुँजीवादी प्रवृतिको विरुद्धमा आवाज उठाएर सङ्घर्ष गरेको कारण नेपाली राजनीतिको चुरो उहाँहरुककै विचारमा केन्द्रीत रहेको बताउनुभयो ।
पोलिटब्युरो सदस्य देबीप्रसाद ज्ञावलीले २०५० साल जेठ १७ गते आफै सहभागी भएर मदन भण्डारीको अस्तु विसर्जन गरी समीको रुख रोपेको स्थानमा नै शालिक अनावरण गर्ने अवसर पाएकोमा खुशी लागेको जनाउँदै अहिले नेपाली राजनीतिमा देखिएका विकृति र विसङ्गति हटाउनका लागि पनि पुष्पलाल र मदन भण्डारीका विचारहरुलाई सबैले अगाडि बढाउनुपर्ने आवश्यकता औंल्याउँनुभयो ।
शालिक अनावरण कार्यक्रममा माडी नगरपालिकाकी नगर प्रमुख ताराकाजी महतोले नेपालको कम्युनिष्ट आन्दोलनमा पुष्पलाल र मदन भण्डारीको योगदानको स्मरण गर्दै पुष्प मदन स्मृति वाटिका माडीको ऐतिहासिक र पर्यटकीय गन्तव्य बनेको जानकारी दिनुभयो ।
पुष्प -मदन स्मृति वाटिकाका अध्यक्ष श्यामकुमार बिष्टको अध्यक्षतामा सम्पन्न भएको शालिक अनावरण कार्यक्रममा नेकपा एमाले प्रदेश कमिटी सदस्य लक्ष्मीकान्त चालिसे,नेकपा माओवादी केन्द्रका प्रतिनिधि भी‌‌म केसी, पुष्प मदन स्मृति वाटिकाका उपाध्यक्ष फणिन्द्र दवाडी लगायतले मन्तव्य राख्नुभएको थियो।
जननेता मदन भण्डारीको अस्तु लाई नेपालका विभिन्न स्थानमा विसर्जन गर्ने पार्टीको निर्णयअनुसार २०५० साल जेठ १७ गते कमरेड देवीप्रसाद ज्ञावलीको नेतृत्वमा माडी छ लक्ष्मीनिवासमा अस्तु विसर्जन गरी समीको रुख रोपिएको थियो ।
अस्तु विसर्जन गरिएको स्थानलाई प्रवर्द्धन गर्ने उद्देश्यले २०५४ सालमा तत्कालिन कल्याणपुर गाविसले २५ हजार बजेट विनियोजन गरी टावर बनाउने काम शुरु गरेको थियो ।
त्यसपश्चात २०७३ साल बैशाखमा माडीमा प्रर्यटन सम्बन्धी अन्तरक्रिया गरी श्यामकुमार बिष्टको अध्यक्षतामा समिति नै बनाएर योजनाबद्ध काम भइरहेको छ ।
अहिले पुष्प मदन बाटिकामा टावर,पिङ, बाल उद्यान, वनभोज स्थल,गोल घर, सभाहल निर्माण भएका छन् भने जिपइन सञ्चालन गर्ने विषयमा अध्ययन भइरहेको अध्यक्ष श्यामकुमार बिष्टले जानकारी दिनुभयो।

पत्रकार आचार्यमाथि भएको आक्रमणको प्रेस चौतारीद्वारा निन्दा, दोषीलाई कारवाहीको माग

चितवन, असार ३२ – पत्रकार कृष्ण आचार्यमाथि भएको सांघातिक आक्रमणको प्रेस चौतारी नेपाल चितवन शाखाले निन्दा र भत्र्सना गर्दै कारवाहीको माग गरिएको छ । शाखा अध्यक्ष सुवास पण्डितद्वारा आज जारी विज्ञप्तिमा ज्यान मार्ने उद्देश्यले गरिएको सांघातिक आक्रमणको निन्दा गरिएको हो ।

विज्ञप्तिमा सरकारी कार्यालय भित्र मदिरासहितको भोजभतेर भएको सूचनाका आधारमा समाचार संकलनका लागि पुगेका पत्रकार आचार्यमाथि कार्यालय प्रमुख राजिव सिंहको निर्देशनमा मदिराले मातेका कर्मचारीहरुले ज्यानै लिने गरी आक्रमण गरेको उल्लेख छ । विज्ञप्तिमा भनिएको छ “विद्युतका कर्मचारीहरुले आचार्यलाई नियन्त्रणमा लिएर कुटपिट गर्नुका साथै लुगा च्याँतेर अर्ध नग्न बनाएर मोवाइल खोसेका थिए । उनीहरुको पञ्जाबाट फुत्किएर ज्यान जोगाउन गेटतर्फ भाग्दै गर्दा कार्यालय प्रमुख सिंहको आदेशमा गेटसमेत बन्द गरेपछि आचार्य पर्खाल नाघेर नजिकै रहेको चितवन पोष्टको अफिसमा ज्यान जोगाउन पुगेका थिए । पर्खाल नाघेर भागेका आचार्यलाई आक्रमणकारीले गेट खोली लखेट्दै चितवन पोष्ट दैनिकको कार्यालयसम्म पुगेका थिए ।”

आचार्यको जफत गरिएको मोवाइल अहिलेसम्म पनि प्राधिकरणका कर्मचारीहरुको नियन्त्रणमा रहेको उल्लेख गर्दै विज्ञप्तिमा भनिएको छ “दिनभर भरतपुर क्षेत्रका जनतालाई मर्मतको नाउँमा लोडसेडिङ्गमा राखेर कार्यालयमा मदिरासहितको भोजभतेर गर्ने र पत्रकार माथि कुटपिट गर्ने घटनामा संलग्न कर्मचारीलाई तत्काल पक्राउ गरी हदैसम्मको कारर्वाहीको माग गर्दछौं ।”

पत्रकारमाथि कुटपिटको निर्देशन दिने, कुटपिटमा संलग्न कर्मचारी जोगाउने, चितवनवासी जनतालाई दिनहुँ लोडसेडिङ्गमा राख्ने विद्युत प्राधिकरण भरतपुर वितरण केन्द्रका प्रमुख राजीव सिंहलाई विभागीय कारर्वाहीका लागि समेत चौतारीले जोडदार माग गरेको छ ।

आउँदा दिनमा संविधान पदत्त प्रेस स्वतन्त्रताको हकबाट बञ्चित नगर्न, नगराउन सम्वन्धित पक्षको ध्यानार्कषण समेत विज्ञप्तिमा गराईएको छ ।

प्रेस चौतारी चितवन शाखाका उपाध्यक्ष एवं नारायणी अनलाईन र सञ्चारपत्र दैनिकका संचालक पत्रकार आचार्यलाई शुक्रबार विद्युत प्राधिकरण भरतपुर वितरण केन्द्रको कार्यालय परिसरमै कुटपिट भएको थियो ।

भरतपुरमा विद्युतका कर्मचारी द्वारा पत्रकार कृष्ण आचार्यमाथि हातपात

चितवन , असार ३१ –  प्रेस चौतारी नेपाल चितवनका उपाध्यक्ष पत्रकार कृष्ण आचार्यमाथि नेपाल विद्युत् प्राधिकरण भरतपुर वितरण केन्द्रका प्रमुख राजीवकुमार सिंहको निर्देशनमा त्यहाँका कर्मचारीहरुले हातपात र दुव्र्यवहार गरेको आरोप लागेको छ ।
भरतपुरमा रहेको विद्युत् प्राधिकरणको शाखा कार्यालयभित्र भोज चलिरहेको सूचनाको आधारमा सूचना संकलन गर्न पुगेका पत्रकार आचार्यमाथि मदिराले मातिएका कर्मचारीहरुले हातपात गरेको पत्रकार आचार्यले बताए । उनले कार्यालय प्रमुख सिंहको ठाडो निर्देशनमा आफूमाथि हातपात भएको आरोप लगाए ।
भोज चलिरहेको फोटो खिचेर फर्किने क्रममा उनीमाथि मदिराले मात्तिएका कर्मचारीहरुले हातपात गर्दै उनको साथमा रहेको दुईवटा मोबाइलसमेत खोसेर लगेको पत्रकार आचार्यले बताए । जबरजस्ती फुत्किएर विद्युत्को कार्यालय परिसरबाट भागेका पत्रकार आचार्यलाई आक्रमणकारीले निकै परसम्म लखेटेका थिए । उनको छाती र हातमा चोट लागेको छ ।
यसै घटनालाई लिएर नेपाल पत्रकार महासंघ र प्रेस चौतारी चितवनको सहयोगमा पत्रकार आचार्यले घटनाको दोषी पत्ता लगाई कारबाही गर्न प्रमुख जिल्ला अधिकारी अस्मान तामाङसमक्ष उजुरी दिएका छन् ।
पत्रकार आचार्य चितवनबाट प्रकाशित हुने सञ्चारपत्र दैनिक र नारायण अनलाइनसँग आवद्ध छन् ।
पत्रकार आचार्यमाथि भएको हातपात र दुव्र्यवहारको प्रेस चौतारी चितवनका अध्यक्ष सुवास पण्डित र संस्थापक अध्यक्ष रामबाबु सुवेदीले दोषीलाई कडाभन्दा कडा कारबाहीको माग गर्दै निन्दा र भत्र्सना गरेका छन् ।

सांसद कृष्णभक्त पाेखरेललाई सर्वाेच्च अदालत द्वारा बरिष्ठ अधिवक्ताकाे पदवी प्रदान

चितवन , असार २९ –  चितवन क्षेत्र नम्वर-२ का सांसद कृष्णभक्त पाेखरेललाई सर्वाेच्च अदालतले बरिष्ठ अधिवक्ताकाे पदवी प्रदान गरेको छ ।
प्रतिनिधि सभा अन्तरगत कानुन न्याय तथा मानवअधिकार समितिका सभापति समेत रहनुभएका पाेखरेलसंग ३० बर्ष बढिकाे कानुन ब्यावसायकाे अनुभव छ ।
नेपालकाे संबिधान-२०७२ काे मस्यौदा निर्माणमा संलग्न पाेखरेलकाे अगुवाइमा दर्जनाै कानुन निर्माण भएका छन् ।
सरल स्वभाव र दक्षताका कारण कानुन ब्यवसायका क्षेत्रमा पाेखरेल अब्बल अधिवक्ता मानिनुहुन्छ ।
कानुन ब्यवसाय संगै राजनीतिमा रहनुभएका पाेखरेल चितवनका लाेकप्रिय जनप्रतिनिधि हुनुहुन्छ । चितवन क्षेत्र नम्वर २ मा लगातार दुईपटक पाेखरेलले लाेकप्रिय मतका साथ निर्वाचनमा जीत हासिल गर्नुभएको थियाे ।
सर्बाेच्च अदालतले पाेखरेल सहित १३३ जनालाई आज बरिष्ठ अधिवक्ताकाे पदवी दिएको हाे ।

काठमाडौंको भृकुटीमण्डपमा रहेको ह्वील चेयरको गोदाममा आगलागी

काठमाडौं , असार २९ – काठमाडौंको भृकुटीमण्डपमा रहेको ह्वील चेयरको गोदाममा आगलागी भएको छ । आगलागी भएको खबर आउने वित्तिकै काठमाडौं महानगरपालिकाको दमकल त्यहाँ पुगेको छ ।अहिले दमकल, प्रहरी र स्थानीयको सहयोगमा आगो नियन्त्रणमा लिने प्रयास भइरहेको छ ।

आगलागी कसरी सुरु भयो भन्ने अझै खुलेको छैन ।

चितवनमा यौन हिंसाविरुद्ध प्रर्दशन

चितवन , असार २८ – चितवनमा यौन हिंसाविरुद्ध प्रर्दशन भएको छ । आज भरतपुरको चौबिसकोठीमा चितवनका स्वतन्त्र युवाहरुद्धारा यौन हिंसा विरुद्ध प्रर्दशन भएको हो । गत शनिबार चितवनकी लेखक सरिता तिवारीले आफूमाथि भएको यौन हिंसाको घटना सामाजिक सञ्जालबाट बाहिर ल्याएपछि सो घटनाको विरोध गर्दै चितवनमा प्रर्दशन भएको थियो । प्रर्दशनमा सहभागिहरुले ‘सर्भाइभरलाई विश्वास गरौ’, ‘यौन हिंसा आरोपीलाई बहिस्कार गरौ’, ‘महिला हिंसाका घटना बाहिर ल्याउन साहस गर्नुहुने प्रत्येक महिलाहरुलाई सलाम’ लगायतका नारा लेखिएका पम्पलेट प्रर्दशन गरेका हुन् । सो हिंसा विरुद्धको प्रर्दशनी कार्यक्रममा बोल्दै सामाजिक अभियन्ता डा. सुवास बस्नेतले यौन दुव्र्यवहार घटना बाहिर ल्याउन अझैपनि कठिन रहेको उल्लेख गरे । उनले लेखक तिवारीले आफूमाथि भएको दुव्र्यवहारको घटना बाहिर ल्याउँर्दै गर्दा सामाजिक व्यवस्था, परिवेस र पितृसत्ताविरुद्ध बोल्न कति कठिन छ भन्ने देखिए पनि बोल्न कति जरुरी छ भन्ने साहासको प्रतिक बनेको उल्लेख गरे । समाजमा यौन दुव्र्यवहार घटना धेरै नै फैलिएको भन्दै महिला हिंसाका घटना बाहिर ल्याउनु आवश्यकता रहेको उनले बताए । लेखक तथा महिलाअधिकारकर्मी सावित्री गौतमले महिला कहिँ पनि सुरक्षित छैनन भन्ने कुराको भोगाइलाई तिवारीमाथि घटेको घटनाले थप एकपटक पुष्टी गरेको बताइन् । ‘आफ्नै सहयोद्धा ३० औँ वर्षदेखि एउटा वाद सिद्धान्तलाई बोकेर हिडेको मान्छेहरुबाट पनि हामी सुरक्षित रहेनछौ ।’ उनले भनिन्, ‘वर्षौ सम्म महिलाको मुद्धा बोकेर हिड्ने , महिलाहरु कहाँ छन् भनेर कविता लेख्नेहरु व्यक्तिबाट यौन हिंसा भएको थाहा पाउदा हाम्रो आघातको गहनता झन बढेको छ। ’
लेखक गौतमले यौन हिंसाका घटना बाहिरिएपछि सबैभन्दा पहिला पिडीत माथि विश्वास गर्नु महत्त्वपूर्ण पाटो रहेको बताइन् । महिला अधिकारकर्मी मिना खरेलले अहिले बाहिरीएको लेखक तिवारीमाथि भएको यौन हिंसाको घटना एउटा प्रतिनिधी घटनामात्रै भएको बताउँर्दै उनले महिलाहरु घरदेखि कार्यस्थलसम्म कहिँ पनि सुरक्षित नभएको उल्लेख गरिन् ।उनले भनिन् , ‘उहाँ एक प्रतिनीधी महिला हो । आरोपीलाई कुनै वाद विचार भनेर जोगाइयो भने तमाम महिला असुरक्षित हुनेछन् ।’ आरोतिलाई कानुनी दायारामा ल्याएर सार्वजनिक नगर्दासम्म आम महिलाहरु यस्ता खाले परिस्थीतीबाट गुज्रनुपर्ने बाध्यता रहिरहने उनले जिकीर गरिन् । उनले पिडितको पक्षमा आफुहरु उभिने र निर्भीक भएर आफ्ना सवाल राखिरहन तिवारीलाई अनुरोध गरिन् ।
तिवारीले २०७२ सालमा लेखक तथा कवि संगीत श्रोताले आफूमाथि यौन हिंसा गरेको भन्दै गत शनिबार सामाजिक सञ्जालबाट घटना बाहिर ल्याएकी थिइन् ।
आफ्नो कविता संग्रह सम्पादनका लागि संगीतको कीर्तिपुरस्थित डेरामा गएको समयमा यौन हिंसा गरेको लेखक तिवारीको आरोप छ ।

माडीको समस्या लिएर काठमाडौ पुगेको प्रतिनिधि मण्डलद्वारा प्रधानमन्त्री देउवा समक्ष भेटघाट

  1. चितवन , असार २८ – चितवनको माडी बाट काठमाडौ गएको प्रतिनिधि मण्डलले आज प्रधानमन्त्री शेरबहादुर देउवा समक्ष भेट गरेको छ । भेटका क्रममा प्रधानमन्त्री देउवाले निकुञ्जभित्र धुलोरहित सडक निर्माण सम्बन्धी प्रस्ताव क्याबिनेट बैठकमा लैजाने र पुरक ई.आई.ए. हुँदैगर्दा बैंकल्पिक केबुल जडान कार्य संगसंगै अगाडि बढाइने प्रतिबद्धता व्यक्त गर्नुभएको छ । उहाँले निकुञ्जका कारण बाटो र बिजुलीमा परेको गाँठो फुकाउन क्याबिनेट बैठकमा प्रस्ताव लगी निर्णय गर्नु पर्ने उहाँको भनाई थियो ।
    चितवन क्षेत्र नं. ३ का प्रतिनिधीसभा सदस्य समेत रहनुभएका नेकपा (माओवादी केन्द्र)का अध्यक्ष तथा पुर्ब प्रधानमन्त्री पुष्पकमल दाहाल प्रचण्डको नेतृत्वमा माडीका नगरप्रमुख ताराकुमारी काजी महतो, उपप्रमुख खेमप्रसाद महतो र निवर्तमान नगरप्रमुख ठाकुर प्रसाद ढकाल सम्मिलित सर्वदलिय प्रतिनिधी मण्डलले प्रधानमन्त्री देउवासंग भेट गरी माडीमा बाटो र बिजुलीको क्षेत्रमा निकुञ्ज सिर्जित अवरोधहरुबारे जानकारी गराएको हो ।
    सोही प्रतिनिधि मण्डलमा प्रतिनिधीसभा अन्तरगत कृषि, सहकारी तथा प्राकृतिक श्रोत समितिका सभापति पूणर्कुमारी सुवेदी, भरतपुर महानगरपालिकाकी मेयर रेनु दाहाल, राष्ट्रिय सभा सदस्य गंगा बेल्बासे लगायतको सहभागिता रहेको बताइएको छ ।  उनिहरुले चितवनका अन्य समस्याका बारेमा समेत जानकारी गराएका हुन ।माडीको प्रतिनिधि मण्डलले यस अघि नेकपा (माओवादी केन्द्र)का अध्यक्ष तथा पुर्ब प्रधानमन्त्री पुष्पकमल दाहाल प्रचण्ड लगायत बिभागिय मन्त्रीहरु सग समेत भेटघाट गरि सकेको छ ।

पेट्रोलियम पदार्थको मूल्य फेरि वढ्यो

काठमाडौं : नेपाल आयल निगमले पेट्रोलियम पदार्थको मूल्य वृद्धि गरेको छ । सोमबार राति १२ बजेदेखि लागु हुनेगरी निगमले नयाँ मूल्य सार्वजनिक गरेको हो ।

पेट्रोलमा २ रुपैयाँ, डिजेल/मट्टितेलमा ९ रुपैयाँ र हवाई इन्धनमा ५ रुपैयाँ वृद्धि गरिएको आयल निगमले जनाएको छ । एलपी ग्याँसमा भने साविककै मूल्य रहने निगमले जनाएको छ ।

मूल्य वृद्धि सँगै अब पेट्रोलको १ सय ८१, डिजेल/मट्टितेलको १ सय ७२ र हवाई इन्धन आन्तरिकतर्फ १ सय ९० हुने निगमले विज्ञप्तिमार्फत बताएको छ ।

नयाँ मूल्य समायोजन पश्चात पनि असार २४ गतेसम्म निगमलाई ३० अर्ब घाटा हुने विज्ञप्तिमा उल्लेख गरिएको छ ।

निर्दोष जीवनको ‘नोस्टाल्जिया’ उपन्यास सार्वजनिक

चितवन , असार १८ – लेखक निर्दोष जीवनको उपन्यास ‘नोस्टाल्जिया’ शनिबार सार्वजनिक भएको छ । गैंडाकोटमा आयोजना भएको कार्यक्रममा साहित्यकारहरू गोविन्दराज विनोदी, निलम कार्की निहारिका र एलबी क्षेत्री लगायतले उपन्यासको संयुक्त विमोचन गरे ।निर्दोष जीवनको यो नवौं कृति हो । उनले यसअघि नेपाली गीत संगीतका चारवटा र साहित्यका चारवटा कृति पाठक/स्रोता समक्ष ल्याइसकेका छन् ।‘नोस्टाल्जिया’मा एक जना संघर्षरत युवाको भोगाइ, पारिवारिक साथ सहयोग र मतान्तर तथा प्रेमका विषयलाई समेटेको निर्दोष जीवनले बताए । ‘तिरस्कारलाई संघर्षले जित्न खोज्नेको कथा यसमा छ’ उपन्यासबारे उनले भने ।उपन्यासबारे साहित्यकार निलम कार्की निहारिकाले उपन्यासमा व्यक्तिगत जस्तो लाग्ने भोगाइहरुमा समाजको तस्बिर झल्केको बताइन् । यो उपन्यासको भाषा सरल रहेको उनको टिप्पणी थियो ।त्यस्तै अर्का वक्ता चितवनका साहित्यकार सिर्जन अविरलले पृत्ति सत्ताको अत्याचार उपन्यासले उधिनेको बताए । कार्यक्रमका प्रमुख अतिथि कविडाँडा साहित्य समाजका अध्यक्ष एलबी क्षेत्रीले चितवनबाट उपन्यास लेखिने क्रम बढ्न थालेको र निर्दोष जीवनले परिपक्क तरिकाले साहित्यिक कोसेली पस्केको बताए । उपन्यासकारको आफ्नै संघर्ष हो कि जस्तो लागे पनि नोस्टाल्जियाले नेपाली समाजको यथार्थ बोलेको उनले बताए ।    -इकान्तिपुर बाट