होमपेजचितवन विशेषभरतपुर कोरोना अस्पतालका सबै संक्रमितलाई भरतपुर अस्पतालमा सारियो

भरतपुर कोरोना अस्पतालका सबै संक्रमितलाई भरतपुर अस्पतालमा सारियो

चितवन, जेठ ३१– तीन दिनमै तयार पारिएको भरतपुर कोरोना विशेष (अस्थायी) अस्पताल अहिले बिजोग अवस्थामा पुगेको छ । अस्पताल भित्रै पानी बग्न थालेपछि त्यहाँ रहेका कोरोना भाइरस (कोभिड–१९) संक्रमितहरुले बिरोध गर्दै शुक्रबार भिडियो नै सार्वजनिक गरे । भिडियो सार्वजनिक भएर चौतर्फी बिरोध सुरु भएपछि त्यहाँ रहेका सबै संक्रमितहरुलाई भरतपुर अस्पताल सारिएको छ ।

आज (शनिबार) अपरान्ह कोरोना अस्पतालमा रहेका १८ जना कोरोना भाइरस संक्रमितलाई भरतपुर अस्पतालको आइसोलेसनमा सारिएको हो । कोरोना संक्रमितलाई सार्नका लागि संयुक्त एम्बुलेन्स चालक संघ चितवनले दुई वटा एम्बुलेन्स सहयोग गरेको थियो । अस्पतालमा संक्रमित हुँदा मर्मत संभार गर्न कठिन भएकाले मर्मतको अवधिका लागि उनीहरु सबैलाई भरतपुर अस्पतालमा सारिएको भरतपुर अस्पतालका प्रमुख मेडिकल सुपरिटेण्डेन्ट डा.श्रीराम तिवारीले जानकारी दिए । उनले भने–‘बिरामी हुँदा मर्मत गर्न कठिन हुन्छ, मर्मतका लागि नै सबै संक्रमितलाई भरतपुर अस्पताल सारेका हौं ।’

उनले सो अस्पतालमा रहेका चार जना डिस्चार्ज भएसंगै सबै १८ जनालाई सारिएको बताए । संक्रमितहरुलाई अस्पतालको ‘ए’ ब्लकको भुई तलामा तयार पारिएको आइसोलेसन कक्षमा राखिएको छ । भरतपुर अस्पतालमा हाल २५ जना संक्रमितको उपचार भइरहेको छ । भरतपुर अस्पतालका अध्यक्ष डा.भोजराज अधिकारीले ममंत संभारपछि कोरोना अस्पताल पुनः संचालन गरिने बताए ।

तीन दिनमै तयार पारिएको भनेर प्रचार गरिएको भरतपुर कोरोना अस्पताल विवादमा तानिदै आएको छ । अस्पतालको सामग्री चोरिएको प्रकरणले अहिले कोरोना अस्पतालमाथि अख्तियारले छानबिन गरिरहेको छ । narayanionline

ताजा समाचार