Home Blog

चितवनमा श्रीमती द्वारा अचानो प्रहार गरि श्रीमानको हत्या

चितवन , श्रावण २४ – चितवनको भरतपुर महानगरपालिका वडा नं २१ पार्वतीपुरमा एक महिलाले आफ्नै श्रीमानको अचानो प्रहार गरि हत्या गरेकी छ्न ।
सोमबार राति १० बजेको समयमा झैझगडा हुँदा उनकी श्रीमती ५४ वर्षीया बिनमाया वि.क.ले ५६ वर्षीय श्रीमान टीकाराम विकको घरमा रहेको अचानोले टाउकोमा हानेर हत्या गरेको प्रहरीले जनाएको छ ।
आफ्नै घरको कोठामा भित्रबाट चुकुल लगाई ओछ्यानमा लडिरहेको जानकारी प्राप्त हुनासाथ इलाका प्रहरी कार्यालय गीतानगर र जिल्ला प्रहरी कार्यालयबाट खटिएको प्रहरी टोलीले ढोकाको चुकुल फुटाई हेर्दा मृतक टीकाराम खुट्टाले भुईंमा टेकी टाउको र जिउको भाग खाटमा घोप्टो अवस्थामा रहेको र निजको तालुको भागमा काटेको चोटबाट अत्यधिक रक्तश्राव भई सिरानीमा जमेको अवस्थामा रहेको फेला पारेको हो । घटनाको बिस्तृत विवरण आउन बाकी रहेको र प्रहरीले घटनाको अनुसन्धान भै रहेको जनाएको छ ।

शिक्षकका हकहितका लागि शिक्षामन्त्री पौडेललाई ज्ञापनपत्र

काठमाडौ , श्रावण २३ -शिक्षकका हकहितका लागि शिक्षामन्त्री देबेन्द्र पौडेललाई ज्ञापनपत्र बुझाइएको छ । शिक्षक हकहित मञ्चका केन्द्रीय अध्यक्ष ज्योति नारायण ढकालको नेतृत्वमा केन्द्रीय समितिले माननीय शिक्षामन्त्री पौडेल लाई देशभरका सामुदायिक विद्यालयका सबै प्रकृतिका स्थायी ,अस्थायी एवम् विस्थापित शिक्षक कर्मचारीहरुको माग पूरा गरिदिन भनी ज्ञापनपत्र बुझाएको हो ।
ज्ञापनपत्र बुझाउदा नेपाल शिक्षक महासंघ राष्ट्रिय समितिका सह अध्यक्ष पुर्ण प्रसाद दवाडी र महासचिव लक्ष्मी किशोर सुवेदीको रोहबरमा ज्ञापनपत्र बुझाइएको हो ।
ज्ञापनपत्रमा स्थायी शिक्षकहरुको सत् प्रतिशत अस्थायी सेवा अवधि गणना गरिनु पर्ने , योगदानमा आधारित पेन्सन नभै पुरानै तवरले दिदै आइरहेको पेन्सन उपलब्ध गराउन , प्रा वि ,निमावि र माबि सबै स्थायी शिक्षकहरुलाइ १० ग्रेड उपलब्ध गराउन , अस्थायी सेवाको आधारमा स्वेच्छिक पेन्सनको व्यवस्था गर्न , हाल सम्मका सबै अस्थायी ,करार तथा विस्थापित शिक्षकहरुलाइ उमेरको हद हटाइ आन्तरिक प्रतिस्पर्धाद्वारा स्थायी गर्न , राहत ,अनुदान शिक्षक , बाल शिक्षक तथा विद्यालय कर्मचारीका मागहरु समेत पूरा गर्न अनुरोध गरिएको छ ।
देशभरका शिक्षक कर्मचारीहरुलाइ एकै प्रकारको नेपाल सरकारको लोगो अंकित परिचय पत्र बनाउन , स्थायी शिक्षकहरुलाइ हरेक ७ बर्षमा बढुवा गर्न र शिक्षकहरुलाइ सम्मानित मर्यादाक्रममा राख्न समेत अनुरोध गरिएको छ ।
ज्ञापनपत्र बुझाउन अध्यक्ष ज्योती नारायण ढकाल ,उपाध्यक्ष गंगाप्रसाद पङ्गेनि , कोषाध्यक्ष सरस्वती अर्याल वाग्ले , सह कोषाध्यक्ष शान्ति शाही ,सदस्य संगिता थापा ,अजिज आलम लगायतका शिक्षक नेताहरु सहभागिता रहेको थियो ।

पेन्सनकाे व्यवस्था सहितका माग पूरा गर्न शिक्षकका अगुवा काठमाडौमा

काठमाडौ , साउन २१ –  शिक्षक हकहित मञ्चले स्थायी शिक्षकहरूलाई शतप्रतिशत अस्थायी सेवा अवधि गणना गरी पेन्सनको व्यवस्था गर्न माग गरेका छन् ।

मञ्चकाे काठमाडौंमा सम्पन्न भेलाले नेपाल शिक्षक महासंघ (राष्ट्रिय समिति) समक्ष निवेदन राख्दै पेन्सनकाे व्यवस्थासहितअन्य आधा दर्जन माग पूरा गर्नका लागि विशेष पहल गर्न माग गरेका छन् ।

उनीहरूले ०७५ चैत्रपछि स्थायी नियुक्ति भएका शिक्षक हरुलाई योगदानमा आधारित पेन्छन् को व्यवस्था गरिदैछ भन्ने सुन्नमा आएकाे भन्दै ‘योगदानमा आधारित फेसन नभई पूरानै तवरको पेन्सन प्राप्तिको लागि पहल गरिदिन, कम्तिमा ५ वर्ष सेवा पुगेका स्थायी शिक्षकलाई बदुवाको लागि पहल गरिदिन र सबै स्थायी शिक्षकहरुलाई १० ग्रेड कायम गर्नको लागि पहल गरिदिन लिखित अनुराेध गरे ।

उनीहरूले सवै प्रकृतिका अस्थायी शिक्षक, राहत शिक्षक, अनुदान शिक्षक, वाल शिक्षक, विद्यालय कर्मचारी र विस्थापित शिक्षकहरूको माग पूरा गर्नका लाग पहल गरिदिन र देशभरका सबै शिक्षक कर्मचारीलाई एकै प्रकारको शिक्षक परिचयपत्रको लागि पहल गरिदिनु हुन पनि अनुराेध गरेका छन् ।

लिखित पत्रमा मञ्चका अध्यक्ष ज्याेतिनारायण ढकाल, सचिव गंगाप्रसाद पंज्ञानी र महासचिव कमल काफ्लेले हस्ताक्षर गरेका छन् ।

माडीका शिक्षक बीरेन्द्र महतोलाई अन्तर्राष्ट्रिय शिक्षा सेवा पुरस्कार

-विपिन पाठक, चितवन श्रावण १७ –  माडी नगरपालिका वडा नम्बर ३ रतनी धोवाह स्थीत श्री राष्ट्रिय आधारभूत विद्यालय रतनी धोवाहका प्रधानाध्यापक बीरेन्द्र महतोलाई एन.आर.एनए नन रेसिडेण्ट नेपाली एसोसिएसन क्यालिफोर्निया,अमेरिकाले उत्कृष्ट विधालय बनाउन गरेको अथक प्रयासको उच्च मुल्याङ्कन गर्दै अन्तराष्ट्रिय शिक्षा सेवा पुरस्कार-२०२२ ले सम्मानित गर्ने भएको छ।
राष्ट्रिय आधारभूत विद्यालय रतनि-धोवाहा रीउ नदिको किनारमा जीर्ण अवस्था र न्युन विद्यार्थी सङ्ख्याका कारण अन्य विद्यालयमा गाभिने अवस्थामा पुगेको थियो। नगरप्रमुख समेत विद्यालय गाभ्ने मनस्थितिमा पुगेका थिए तर महतोले हठ गरेर मर्च हुन दिएनन्। सोही अवस्थामा बाढी पसेर जीर्ण भएको विद्यालयलाई महतोकै पहलमा दान स्वरूप १२कठ्ठा ७धुर जग्गा खोजी स्थानान्तरका साथ नयाँ ढङ्गले सञ्चालन गरिएको थियो। बिस्तारै बिस्तारै विद्यालय प्रगतिको लयमा फर्कियो। अधिकांश समय विद्यालयमा नै विताउने महतोले निरन्तर अभिभावक तथा सरोकारवाला निकायलाई घचघच्याइ रहे।हाल उक्त विद्यालय बालमैत्री विद्यालयका रूपमा सुपरिचित रहनुका साथै ग्रिन क्लिन वातावरण,आइसिटि ल्याव,इ लाइब्रेरी, मन्टेश्वरी विधीद्वारा पठनपाठन जस्ता कारण चर्चामा रहेको छ। माडी नगरपालिकाद्वारा नमुना विद्यालयका रूपमा पुरस्कृत गरिएको उक्त विद्यालयमा हाल २५७ विद्यार्थी रहेका छन्।
२०७३ श्रावण २७ गते प्रध्यानाध्यापक नियुक्त भएका महतोले निरन्तर विद्यालयको भौतिक र शैक्षिक उन्नयनमा आफ्नो व्यक्तिगत आर्थिक रकम समेत लगानी गरेका थिए।हाल उनलाई प्रदान गरिएको अन्तर्राष्ट्रिय शिक्षा सेवा पुरस्कार यही भदौ ७ गते एक कार्यक्रमका बीच प्रदान गरिने छ । पुरस्कारमा ११सय अमेरिकी डलरका साथमा ताम्रपत्र समेत रहेको आयोजक संस्थाले जनाएको छ।

पहिरोका कारण नारायणगढ–मुग्लिन सडक अवरुद्ध

चितवन , साउन १७ – अविरल बर्षा पछि झरेको पहिरोका कारण नारायणगढ–मुग्लिन सडक अवरुद्ध भएको छ । नारायणगढ मुग्लिन सडकखण्डअन्तर्गत भरतपुर महानगरपालिका–२९ केराबारीमा गएराती देखि लेदोसहितको पहिरो खस्दा सडक दुईतर्फी अवरुद्ध भएको हो ।

अहिले पहिरो पन्छाउने काम भइरहेको जिल्ला प्रहरी कार्यालय चितवनले जनाएको छ । सो सडक खण्डको अन्य केही ठाउमा पनि पहिरो गएको जनाइएको छ । गए रातिदेखि लगातार परिरहेको पानीले चितवनका विभिन्न स्थानमा डुवानमा परेको समेत जनाएको छ । नारायणी नदि लगायतका अन्य नदिहरुमा समेत जल स्तर बढेको छ ।

राष्ट्रिय चिकित्सक संघ चितवनको अध्यक्षमा डा.प्रतीक न्यौपाने निर्वाचित

विपिन पाठक , चितवन, श्रावण १४ – राष्ट्रिय चिकित्सक संघ चितवनको दोस्रो अधिवेशन भरतपुरमा सम्पन्न भएको छ नेकपा एमाले स्वास्थ्य विभाग प्रमुख योगेश भट्टराईको प्रमुख आथित्यतामा सम्पन्न अधिवेशनले डा.प्रतीक न्यौपानेको अध्यक्षतामा १५ सदस्य नयाँ कार्यसमिति निर्वाचित गरेको छ। जसको उपाध्यक्षमा डा.जयराम अधिकारी र डा.मञ्जु पाण्डे सचिवमा डा.अमित चौधरी उप सचिवमा डा.पल्लवराज पौडेल कोषाध्यक्षमा डा.नवराज लामिछाने रहनुभएको छ। कार्यक्रममा नेकपा एमाले चितवनका अध्यक्ष रामप्रसाद न्यौपाने राष्ट्रिय स्वास्थ्यकर्मी महासङ्घ केन्द्रीय अध्यक्ष डा.झलक शर्मा गौतम, महासचिव डा.सन्तोष पौडेल, उपाध्यक्ष रामहरी ढकाल लगायतको उपस्थिति रहेको थियो। डाक्टर केशव पौडेलको अध्यक्षतामा भएको कार्यक्रमको सञ्चालन डा.अमित चौधरीले गर्नुभएको थियो।
नेकपा एमाले निकट सुवेच्छुक संगठनका रुपमा रहेको चिकित्सक संघमा जिल्ला भरिका प्रतिनिधि डाक्टरहरुको उपस्थितिले तीन बर्षीय कार्यकालका लागि नयाँ नेतृत्व चयन गरेको हो।

भरतपुरमा श्रीमतीको खुकरी प्रहार गरी हत्या पछि श्रीमान द्वारा हाम्फालेर आत्महत्या

चितवन , साउन ९ – चितवनको भरतपुरमा श्रीमानले श्रीमतीको खुकरी प्रहार गरी हत्या गरेका छन्। भरतपुर महानगरपालिका वडा नं. १० रमाईलो चोकमा ३५ वर्षीया रुस्मा घिमिरे (आचार्य) को उनका श्रीमान ४३ वर्षीय कृष्णप्रसाद आचार्यले खुकुरी प्रहरी गरी हत्या गरेको जिल्ला प्रहरी कार्यालय चितवनका प्रवक्ता नरहरि अधिकारीले जानकारी दिए।कृष्णप्रसादले आफ्नै घरको तीन तला माथि रहेको बैठक कोठामा श्रीमतीलाई खुकुरी प्रहार गरेका थिए। खुकुरी प्रहारबाट गम्भीर घाइते भई उपचारको लागी रुष्मालाई पुरानो मेडिकल कलेज लगिएकोमा आइतबार राती नै १०ः४० बजेको समयमा चिकित्सकले मृत घोषणा गरेको जिल्ला प्रहरी कार्यालय चितवनका प्रवक्ता नरहरि अधिकारीले जानकारी दिए।श्रीमतीलाई आक्रमण गरेलगतै घरको छतमा पुगी श्रीमान कृष्णप्रसाद आचार्यले हाम फालेका थिए। घाइते भएका आचार्यको पनि उपचारको क्रममा मृत्यु भएको प्रहरीले जनाएको छ। दुवैजनाको शव पोष्टमार्टमको लागि भरतपुर अस्पतालमा राखिएको छ।

माडीमा पुष्पलाल र मदन भण्डारीको शालिक अनावरण

चितवन ,साउन ७ – नेपाल कम्युनिष्ट पार्टी एमालेका पोलिटब्युरो सदस्य एवम् चितवन जिल्ला ईन्चार्ज देवीप्रसाद ज्ञावलीले पुष्पलाल र मदन भण्डारीका विचारले नै नेपालको कम्युनिष्ट आन्दोलन अगाडि बढेको जनाउँदै उहाँहरुका विचारहरुलाई अनुकरण गर्दै अगाडि बढ्नुपर्ने आवश्यकता रहेको बताउनुभयो ।
४४ औं पुष्पलाल स्मृति दिवसको अवसरमा पुष्प – मदन स्मृति व्यवस्थापन समिति माडी ६ द्वारा आज शनिबार आयोजित शालिक अनावरण कार्यक्रममा पुष्प -मदनको शालिक अनावरण गर्दै पोलिटब्युरो सदस्य ज्ञावलीले पुष्पलाल र मदन भण्डारीका विचारद्वारा नै नेकपा एमाले अगाडि बढिरहेकोले नै देशको लोकप्रिय पार्टी बनेको धारणा राख्नुभयो।
पुष्पलाल र मदन भण्डारीले दलाल, नोकरशाही र पुँजीवादी प्रवृतिको विरुद्धमा आवाज उठाएर सङ्घर्ष गरेको कारण नेपाली राजनीतिको चुरो उहाँहरुककै विचारमा केन्द्रीत रहेको बताउनुभयो ।
पोलिटब्युरो सदस्य देबीप्रसाद ज्ञावलीले २०५० साल जेठ १७ गते आफै सहभागी भएर मदन भण्डारीको अस्तु विसर्जन गरी समीको रुख रोपेको स्थानमा नै शालिक अनावरण गर्ने अवसर पाएकोमा खुशी लागेको जनाउँदै अहिले नेपाली राजनीतिमा देखिएका विकृति र विसङ्गति हटाउनका लागि पनि पुष्पलाल र मदन भण्डारीका विचारहरुलाई सबैले अगाडि बढाउनुपर्ने आवश्यकता औंल्याउँनुभयो ।
शालिक अनावरण कार्यक्रममा माडी नगरपालिकाकी नगर प्रमुख ताराकाजी महतोले नेपालको कम्युनिष्ट आन्दोलनमा पुष्पलाल र मदन भण्डारीको योगदानको स्मरण गर्दै पुष्प मदन स्मृति वाटिका माडीको ऐतिहासिक र पर्यटकीय गन्तव्य बनेको जानकारी दिनुभयो ।
पुष्प -मदन स्मृति वाटिकाका अध्यक्ष श्यामकुमार बिष्टको अध्यक्षतामा सम्पन्न भएको शालिक अनावरण कार्यक्रममा नेकपा एमाले प्रदेश कमिटी सदस्य लक्ष्मीकान्त चालिसे,नेकपा माओवादी केन्द्रका प्रतिनिधि भी‌‌म केसी, पुष्प मदन स्मृति वाटिकाका उपाध्यक्ष फणिन्द्र दवाडी लगायतले मन्तव्य राख्नुभएको थियो।
जननेता मदन भण्डारीको अस्तु लाई नेपालका विभिन्न स्थानमा विसर्जन गर्ने पार्टीको निर्णयअनुसार २०५० साल जेठ १७ गते कमरेड देवीप्रसाद ज्ञावलीको नेतृत्वमा माडी छ लक्ष्मीनिवासमा अस्तु विसर्जन गरी समीको रुख रोपिएको थियो ।
अस्तु विसर्जन गरिएको स्थानलाई प्रवर्द्धन गर्ने उद्देश्यले २०५४ सालमा तत्कालिन कल्याणपुर गाविसले २५ हजार बजेट विनियोजन गरी टावर बनाउने काम शुरु गरेको थियो ।
त्यसपश्चात २०७३ साल बैशाखमा माडीमा प्रर्यटन सम्बन्धी अन्तरक्रिया गरी श्यामकुमार बिष्टको अध्यक्षतामा समिति नै बनाएर योजनाबद्ध काम भइरहेको छ ।
अहिले पुष्प मदन बाटिकामा टावर,पिङ, बाल उद्यान, वनभोज स्थल,गोल घर, सभाहल निर्माण भएका छन् भने जिपइन सञ्चालन गर्ने विषयमा अध्ययन भइरहेको अध्यक्ष श्यामकुमार बिष्टले जानकारी दिनुभयो।

पत्रकार आचार्यमाथि भएको आक्रमणको प्रेस चौतारीद्वारा निन्दा, दोषीलाई कारवाहीको माग

चितवन, असार ३२ – पत्रकार कृष्ण आचार्यमाथि भएको सांघातिक आक्रमणको प्रेस चौतारी नेपाल चितवन शाखाले निन्दा र भत्र्सना गर्दै कारवाहीको माग गरिएको छ । शाखा अध्यक्ष सुवास पण्डितद्वारा आज जारी विज्ञप्तिमा ज्यान मार्ने उद्देश्यले गरिएको सांघातिक आक्रमणको निन्दा गरिएको हो ।

विज्ञप्तिमा सरकारी कार्यालय भित्र मदिरासहितको भोजभतेर भएको सूचनाका आधारमा समाचार संकलनका लागि पुगेका पत्रकार आचार्यमाथि कार्यालय प्रमुख राजिव सिंहको निर्देशनमा मदिराले मातेका कर्मचारीहरुले ज्यानै लिने गरी आक्रमण गरेको उल्लेख छ । विज्ञप्तिमा भनिएको छ “विद्युतका कर्मचारीहरुले आचार्यलाई नियन्त्रणमा लिएर कुटपिट गर्नुका साथै लुगा च्याँतेर अर्ध नग्न बनाएर मोवाइल खोसेका थिए । उनीहरुको पञ्जाबाट फुत्किएर ज्यान जोगाउन गेटतर्फ भाग्दै गर्दा कार्यालय प्रमुख सिंहको आदेशमा गेटसमेत बन्द गरेपछि आचार्य पर्खाल नाघेर नजिकै रहेको चितवन पोष्टको अफिसमा ज्यान जोगाउन पुगेका थिए । पर्खाल नाघेर भागेका आचार्यलाई आक्रमणकारीले गेट खोली लखेट्दै चितवन पोष्ट दैनिकको कार्यालयसम्म पुगेका थिए ।”

आचार्यको जफत गरिएको मोवाइल अहिलेसम्म पनि प्राधिकरणका कर्मचारीहरुको नियन्त्रणमा रहेको उल्लेख गर्दै विज्ञप्तिमा भनिएको छ “दिनभर भरतपुर क्षेत्रका जनतालाई मर्मतको नाउँमा लोडसेडिङ्गमा राखेर कार्यालयमा मदिरासहितको भोजभतेर गर्ने र पत्रकार माथि कुटपिट गर्ने घटनामा संलग्न कर्मचारीलाई तत्काल पक्राउ गरी हदैसम्मको कारर्वाहीको माग गर्दछौं ।”

पत्रकारमाथि कुटपिटको निर्देशन दिने, कुटपिटमा संलग्न कर्मचारी जोगाउने, चितवनवासी जनतालाई दिनहुँ लोडसेडिङ्गमा राख्ने विद्युत प्राधिकरण भरतपुर वितरण केन्द्रका प्रमुख राजीव सिंहलाई विभागीय कारर्वाहीका लागि समेत चौतारीले जोडदार माग गरेको छ ।

आउँदा दिनमा संविधान पदत्त प्रेस स्वतन्त्रताको हकबाट बञ्चित नगर्न, नगराउन सम्वन्धित पक्षको ध्यानार्कषण समेत विज्ञप्तिमा गराईएको छ ।

प्रेस चौतारी चितवन शाखाका उपाध्यक्ष एवं नारायणी अनलाईन र सञ्चारपत्र दैनिकका संचालक पत्रकार आचार्यलाई शुक्रबार विद्युत प्राधिकरण भरतपुर वितरण केन्द्रको कार्यालय परिसरमै कुटपिट भएको थियो ।

भरतपुरमा विद्युतका कर्मचारी द्वारा पत्रकार कृष्ण आचार्यमाथि हातपात

चितवन , असार ३१ –  प्रेस चौतारी नेपाल चितवनका उपाध्यक्ष पत्रकार कृष्ण आचार्यमाथि नेपाल विद्युत् प्राधिकरण भरतपुर वितरण केन्द्रका प्रमुख राजीवकुमार सिंहको निर्देशनमा त्यहाँका कर्मचारीहरुले हातपात र दुव्र्यवहार गरेको आरोप लागेको छ ।
भरतपुरमा रहेको विद्युत् प्राधिकरणको शाखा कार्यालयभित्र भोज चलिरहेको सूचनाको आधारमा सूचना संकलन गर्न पुगेका पत्रकार आचार्यमाथि मदिराले मातिएका कर्मचारीहरुले हातपात गरेको पत्रकार आचार्यले बताए । उनले कार्यालय प्रमुख सिंहको ठाडो निर्देशनमा आफूमाथि हातपात भएको आरोप लगाए ।
भोज चलिरहेको फोटो खिचेर फर्किने क्रममा उनीमाथि मदिराले मात्तिएका कर्मचारीहरुले हातपात गर्दै उनको साथमा रहेको दुईवटा मोबाइलसमेत खोसेर लगेको पत्रकार आचार्यले बताए । जबरजस्ती फुत्किएर विद्युत्को कार्यालय परिसरबाट भागेका पत्रकार आचार्यलाई आक्रमणकारीले निकै परसम्म लखेटेका थिए । उनको छाती र हातमा चोट लागेको छ ।
यसै घटनालाई लिएर नेपाल पत्रकार महासंघ र प्रेस चौतारी चितवनको सहयोगमा पत्रकार आचार्यले घटनाको दोषी पत्ता लगाई कारबाही गर्न प्रमुख जिल्ला अधिकारी अस्मान तामाङसमक्ष उजुरी दिएका छन् ।
पत्रकार आचार्य चितवनबाट प्रकाशित हुने सञ्चारपत्र दैनिक र नारायण अनलाइनसँग आवद्ध छन् ।
पत्रकार आचार्यमाथि भएको हातपात र दुव्र्यवहारको प्रेस चौतारी चितवनका अध्यक्ष सुवास पण्डित र संस्थापक अध्यक्ष रामबाबु सुवेदीले दोषीलाई कडाभन्दा कडा कारबाहीको माग गर्दै निन्दा र भत्र्सना गरेका छन् ।